Iddie fannen

Deng éischt Iddi ass net onbedéngt déi GENIALst !

Fir eng GENIAL Iddi ze fanne muss de der meeschtens virdru vill verschidden Iddien afale loossen. Op dëser Säit gi Kreativitéits-Techniken beschriwwen, déi der hëllefe vill verschidden Iddien ze fannen . E puer Technike si ganz einfach – anerer méi komplizéiert. Probéier se einfach aus a benotz déi, déi der am beschte gefält. Déi meescht kennen eleng – oder an der Grupp benotzt ginn! 

Brainstorming

De Brainstorming (aus dem Engleschen: Brain = Gehir & Storm = Stuerm) erlaabt, vill verschidden Iddien a kuerzer Zäit fannen!

Stell eng konkret Fro. Looss der da spontan esou vill Iddie wéi méiglech dozou afalen. So alles wat der spontan duerch de Kapp geet, och déi déits de net esou gutt fënns.

Am einfachsten ass et, een aus denger Grupp schreift all eenzel Iddi op e klengt Stéck Pabeier. Sou kënnt der se dono besser sortéieren an déi GENIALst Iddi erauspicken.

Tipp:  Du kanns dës Technik roueg e puer mol hannerenee benotzen!

Übung:  Stell der dës Fro: Wat nerft oder stéiert dech an dengem Alldag? Du fënns sécher vill verschidde Saachen! Wiel eng bestëmmten Iddi eraus a maach nach e Brainstorming andeems de dech frees: Wéi kanns de dat ännere wat dech nerft?

Brainwriting

De Brainwriting (aus dem Engleschen: Brain = Gehir & Writing = Schreiwen) ass ähnlech wéi de Brainstorming. Beim Brainwriting geet et och drëm vill Iddien ze fannen.

Stell erëm eng konkret Fro! Huel der dann e bësse méi Zäit, denk no, a schreif dann all Iddi op e klengt Stéck Pabeier. Probéier och hei erëm esou vill Iddie wéi méiglech ze fannen an notéier all Iddi, och déi déi net esou gutt sinn.  Jiddereen an der Grupp mécht dat fir sech eleng an dono réischt ginn all d'Iddien zesumme geluecht.

Tipp:  Esou wéi beim Brainstorming kanns de dës Technik e puer mol benotzen! Oder souguer a Kombinatioun mam Brainstorming!

Übung:  Wat an dengem Alldag wëlls de verbesseren oder vereinfachen?

Iddie verfäineren

Dës Technik kann der hëllefen, eppes Bestëmmtes un enger Saach oder eng Iddi ze änneren andeems de 7 ganz konkret Froen dozou stells!

  1. Kann een d’Saach, oder en Deel dovun, ersetzen ? („Substitutioun“)
  2. Kann een eng nei Zesummestellung fannen? („Kombinatioun“)
  3. Kann ee verschidden Deeler dovun anescht zesummesetzen? („Ëmuerdnung“)
  4. Kann een d’Form änneren? Oder d’Faarf? („Upassung“)
  5. Kann een et d'Gréisst oder d'Gewiicht veränneren? („Vergréisserung“)
  6. Kann ee verschidde Funktionalitéiten ewech loossen? („Eliminatioun“)
  7. Kann een et anescht benotzen? Oder kann een eng aner Zilgrupp domat erreechen? („neie Notzen“)

Negative Brainstorming

Eng negativ Technik fir positiv Resultater! Wann der einfach keng Léisung fir e Problem afält kann dës Technik der hëllefen.

Dréi däi Problem einfach em!  Amplatz dech ze froen „Wéi léisen ech mäi Problem?“ - fro dech „Wat verursaacht mäi Problem?“. Maach dann e Brainstorming fir Iddien ze fannen (esou wéi hei uewe beschriwwen!). Benotz dann dës Iddie fir eng Léisung fir däin initiale Problem ze fannen!!

Übung:  Stau nerft jiddereen! Mee wéi kann een dat léisen? Iwwerlee der mol wat e Stau verursaacht!!

Blummen-Associatioun

Dës Technik ass e bësse méi komplizéiert, mee dofir ganz nëtzlech. Se erlaabt der, dech vun dengem Problem oder denger Fro ze distanzéieren a schaaft esou Plaz fir méi Kreativitéit:

  1. Schreif déi wichtegst Iddi oder den Haaptdeel vun dengem Problem an d’Mëtt vun engem Blat
  2. Iwwerlee der passend Associatiounen a schreif se ronderëm dat wichteg Wuert, esou wéi d’Form vun enger Blumm
  3. Benotz dann déi nei Wieder als Ausgangspunkt fir weider Associatiounen
  4. Wiel dann ee Wuert als Inspiratioun fir nei Léisunge fir däi Problem ze fannen.

Übung:  Schreif den Numm vun engem Déier op e Blat. Iwwerlee der dann 8-10 Wieder déi der zu deem Déier afalen. Huel eent vun deene Wieder a benotz et als Inspiratioun fir nei Léisunge fir däi Problem ze fannen!

De Superheld

De Superheld hëlleft net nëmme Mënschen déi an Nout sinn! E kann och hëllefen nei Léisungen ze fannen!

Übung:  Denk un e Superheld: wat sinn seng Super-Fähegkeeten? Wéi géif de Superheld de Problem léisen?

Sief kreativ a setz deng Phantasie an! Stell der vir, wéi de Superheld agräife géif a benotz déi Iddi, fir deng eege Léisung ze fannen!

Quick Storm

Dës Technik (aus dem Engleschen: Quick = séier & Storm = Stuerm) hëlleft Iddien ze kombinéieren an doduerch kreativ Léisungen ze fannen.

Übung:  Iwwerlee der 2 Stéchwierder déi zu dengem Problem passen. Mach dann eng Lëscht mat 10 Eegeschafte fir all eenzel Wuert. Kombinéier Wieder aus deenen 2 Lëschten a benotz dës Kombinatioune fir nei Iddien ze fannen!

Nei Iddien duerch komesch Saachen

Mat dëser Technik kenne witzeg & onerwaarte Léisunge fir e Problem fonnt ginn un déi een ouni dës Technik ni geduecht hätt. Esou si scho vill grouss Erfindungen entstan – quasi duerch „Zoufall“.

Übung:  Maacht 2 Gruppen! All Grupp kritt eng Saach déi iwwerhaapt näischt mam eigentleche Problem ze dinn huet. Déi 2 Gruppen huelen dann déi Saach genee ënnert d’Lupp a schreiwen d’Eegeschaften dovun op. Benotzt dann déi Eegeschafte fir nei Léisunge fir den eigentleche Problem ze fannen!

Tipp: Komesch Saach fënnt een iwwerall! Maach einfach mol en Tour duerch d’Haus!

De GENIALen Tipp !

Dës Techniken erlaben der vill flott Iddien ze fannen. Dono muss de aus all deenen Iddien déi beschten erauswiele fir deng GENIAL Iddi ze fannen.

An der Rubrik  Iddien erauswielen  gëtt erkläert wéi dat geet! 

Iddien erauswielen

Besich eis op Facebook !